1. August 2024: Rede im Haslibrunnen

Grüessech mitenang

Härzleche Dank fürd Iladig zur 1. Ougust-Fiir hie im Haslibrunne. S’Haslibrunne isch e immens wichtigi Institution in Langethau. Nid nume, wöusi ihrem Zwäck entsprächend Wohne und Pflege für Mönsche im Ruhestand mit höchstem Standard ermöglecht, sonder wöusi Begägnie schafft, generationenübergrifend dänkt und agiert und meh isch, aus es klassischs Autersheim. Umso meh hetsmi gfröit, dassi bi agfrogt worde hie härezcho.

Ou hüt wider hets Haslibrunne gschafft, e Vöuzauh vo Mönsche a dä 1. Ougust Brunch zlocke und zämezbringe. Für die Zit ids, simer e mehr oder weniger zuefäuigi Gmeinschaft, mir löhnis ufenang ih, mache schöni Erläbnis und näh hoffentlech gueti Erinnerige mit. Die Zuefäugi Gmeinschaft isches, wo mir am 1. Ougust wichtig isch.

Gmeinschafte, Communities sis wos Haslibrunne starch mache. I stöue mir s’Haslibrunne echli wiene WG vor, wo Mönsche i ähnlechem Auter zäme läbe und so e Gmeinschaft böude. Dir chöit hie ufnang ufpasse, öich gägesitig ungerstütze, vonang lerne, aber heit ou öji Rückzugsmöglechkeite. Eigentlech ischs Haslibrunne e Swiss-Miniature. Jedes het sis Plätzli aber ou Ruum für Begägnig und Ustusch. U wie ou süsch i üsere Gösuschaft, bruche döu bids meh Ungerstützig aus angeri. S’Haslibrunne aus Swiss Miniature isch es schöns Bispöuh fürne Gmeinschaft.

I betone das so, wöui dr Iidruck ha, dassmer bids d’Gmeischaft, s’Gmeinschaftsgfüueh und s’Gmeinwoh usde Ouge verlüre i üsere Gsöuschaft. Mir fördere Vereinzelig, betone s’Eigete, s’Einzige unds «Miis», statt s’Gmeinsame und «üses». Debi isch dr Grund füre 1. Ougust jo äbeh grad d’Gmeinschaft. Statt allei, gsschider zäme. Statt nur für sich luege, gschidr ufenang. I wünschemer, dassmer wider meh üs ufs Gemisname besinne und Gmeinschafte und Begägnigsrüm sueche und fördere. Schön, sit dir hüt aui do, um fürne Zit e Gmeinschaft z’si.

Natürlech, e Gmeinschaft si, bedütet nid, dassme gäng dr gliche Meinig muess si, s’gliche ässe sött gärn ha oder dr glich Läbensentwurf sött verfouge. Umso wichtiger isches, dassmer ufdr Basis vor Gmeinschaft, es System het, wod Vöoustimmigkeit zueloht, abhout u ifoht. Üses politische System erloubt das, fürne usgsuechti Gruppe.

Gärn möchti uf zwöi wichtigi politischi Momänte usdr letzte Zit igoh.

Im Novämber 2021 isch d’Pflegeinitiative agnoh worde. Das isch die ersti gwärkschaftlechi Initiative gish, wo je isch agnoh worde. Ufd Umsetzig vode Forderige nach bessere Usböudige, Arbeitsbedingige und Witerentwickligsmöglechkeite im Pflegbruef müessemer leider no bids warte. I hoffe aber fest, dass de grad ous Pflegpersonau hier im Haslibrunne vode Massnahme cha profitiere. Dr Bruef muess attraktiv blibe, het me Wärtschetzig verdient und isch üsi Zuekunft. Mitm stigende Durchschnittsauter ir Gsöuschaft wärdemer no gäng wie meh agwise si ufd Mönsche i Pflegbrueüf. A dere Stöu, merci föouh mouh für öji Büez.

Aber nid nume dä Teil vode Mönsche hier im Haslibrunne erläbt Verbesserige. Dä Früehling isch die 13. AHV-Ränte agnoh worde. Si ermöglecht föune Mönsche im Ränteauter wo im Präkariat läbe, bids meh Sicherheit und Stabilität. Wöu grad nachme ereignisriche und voue Läbe ir Bruefswäut, ir Sorgearbeit oder ou nachme aktivistsiche Läbe, söttme grad nid müesse jede Rappe umchehre, sondern unbedingt die verblibendi Zit ganz genau so isetze chönne, wies eim dient. I hoffe auso, dass d’ Bewohner*inne im Haslibrunne vor 13. AHV chöi Gebruch mache.

Villech mögeternech ou chli ad Debatte im Abstimmigskampf erinnere. Eingie hei gseid, si lehne die 13. AHV Ränte ab, wöu sis nid bruche. Aber wemer nume mit dere Istellig würde Politik mache, Gsöuschaft witerentwickle und Veränderige wöue asträbe, blibemer stoh. Mir dörfe debi nid nume drah dänke, was mir dient, sondern was föoune dient. Und mir söue ou nid dänke, «dasses jo scho immer so sig gsih» oder «dassme die und die Verbesserig ou nid gha heig, auso söues ids angeri ou nid ha». So chömemmr nid witer. Und do chunt dr generationeübergrifend Ustusch is Spöou. Es schafft Verständnis fürd Sroge vor hüttige Jugend und fürd Burn-Outs vode Milenials und dLäbeserfahrige vode Babyboomer und öutere Generatione.

Begägnisrüüm heimer mehrerei im Stadtzäntrum. Nid nume hies Haslibrunne, sondern ou sit däm Summer mobili Begrüenig mit Sitzglägeheite. E Vorstoss vode SP-Grüene Fraktion. Es isch so schön z’gseh, wie verschidini Lüt uf dene Houezlemänt chille, rede, picknicke, Chinder wickle, umeturne undse so zu ihrne mache. E Vöufauht vor Gsöuschaft wird so sichtbar. I hoffe, dass ou d’Bewohnerinnen vom Haslibrunne die tolle Houzelemänt schätze undse bruche.

Mir isch aber ou bewusst, dass s’Stadttzentrum nid num zuegänglech isch. Es het für Mönsche mit igschränkter Mobilität fei e chli Hürdene und Umwäge. I hoffe mir chöi in Zukeunft dr öffentlech Stadtruum inklusiver gstaute. Mit mehr Begägnisrüüm chöimer nöji Wäge goh, zrugg zure Gmeinschaft.

Ous Halsibrunne isch nöji Wäge gange mit däm spannende Nöjbou hie. Wahrschinlech ischs ou für mängi Bewohnerin e nöje Wäg, wo beschritte wird, sobaudme hie häreziet, i die Swiss Miniatur WG. E Nöje Wäg, Nöjland oder aber ou e Nöjstart. Es isch es wichtigs, villech s’ledschde Kapitu im Läbe, hie dörfe zwohne und zur Rueh cho.

I setzemi säuber föouh mitm Thema «Pouse mache» usenang E Pouse mache isch nid nume öpiss passivs, oder Fulänze. Pouse mache cha ou sehr aktiv si, z.B. Sport mache, Mölele, Gärtnere, soziale Ustusch ha. Für jedes vo üs isch Pouse mache öpiss angers. Houptsach d’Situation erloubt eim obe abezchoh und sech z’entspanne. SpHasliburnne cha ou meh si aus nur es Vorböud fürnes akitvs Läbenskapitu, sondern ou fürs Pouse mache us gniesse. I stöeuemr vor, dassme hie cha zur Rueh cho; ändlech Pouse mache, weme das wott; nöji Hobbies lerne; Fründschafte schliesse; huufe Spaziergäng mache und im beste Fau das Kapitu hie im Haslibrunne aus Nöjstart im eigete Läbe erläbe, wöu hie fingt jo bekanntlech s’Läbe statt.

E Nöjstart wird Langethau das Johr ou erläbeh. Im Oktober wird wider gwäuht. 4 vo 7 Gmeindrotssitze si nöj z’Bsetze und ou im Stadtrort wirds Veränderige gäh. E Chance fürne Nöjstart. A dere Stöu möchti öich bitte, göht go wähle. Düet öjes Umfäud animiere zwähle. Mir fiire hüt dr erst Ougust, aus Gmeinschaft, generationeübergrifend. I möcht d’Schwiz hüt ou defür fiire, dass mängi vo üs, dörfe wähle. Mini Bitt a öich isch auso, dassdr im Herbst vo öjem Wauhrächt Gebruch machet.

Weimer es Wettkämpfli drus mache? jedes vo üs hie ine, wird ei witeri Person animiere und motiviere, z’wähle. Das wär toll! Wöui nid nume s’Haslibrunne söu e Swissminiature dörfe si, sondenr ous Parlamänt und Regierig sötte eini si. Nämlech es Abböud, e Repräsentanz vor Vöoufauht vo Langethau.

Dr 1. Ougust isch e Tag zum fiire. Mir fiire d’Vöouhfauht, Begägnige, Gmeinschaft, d’Politik und ganz augemein s’Läbe i üsere wunderschöne und sichere Schwiz, i üsem wunderschöne und sichere Langethau.

Merci föouh mouh fürd Iladig und öji Ufmerksamkeit.